ԿԳ նախարարի պաշտոնակատար Արայիկ Հարությունյանի ուղերձն Ամանորի և Սուրբ Ծննդյան տոների կապակցությամբ
Սիրելի՛ աշակերտներ և ուսանողներ, ուսուցիչներ, դասախոսներ և գիտաշխատողներ, կրթության և գիտության ոլորտի պատասխանատուներ
Ջերմորեն շնորհավորում եմ բոլորիդ Ամանորի և Սուրբ Ծննդյան տոների առթիվ:
Անցնող տարին նշանակալի էր ինչպես ողջ երկրի, այնպես էլ կրթության և գիտության համակարգի համար: Արժեքների հեղափոխությունը բացառիկ հնարավորություններ է ստեղծել՝ ժառանգածը գնահատելու, երկիրը նորովի կառուցելու, հասարակական և տնտեսական առաջընթացն ապահովելու համար։ Այդ գործում անչափ կարևոր է կրթության և գիտության համակարգի դերակատարությունը, քանզի դա է հենց այն միջավայրը, որտեղ ձևավորվում են քաղաքացիական արժեքները, հանրային մշակույթը և աշխարհայացքը, ապահովվում է տնտեսական, մշակութային և տեխնոլոգիական առաջանցիկ զարգացումը։
Համոզված եմ, որ 2019 թվականը բոլորիս ջանքերով շրջադարձային կլինի կրթության և գիտության ոլորտի հանգուցային խնդիրները լուծելու և կայուն առաջընթացի ճանապարհ դուրս գալու գործում։
Մաղթում եմ բոլորիդ հաջողություններ ձեր պատվաբեր և նվիրական աշխատանքում, մասնագիտական նվաճումներ, ստեղծագործական բերկրանքի բազում պահեր, առողջ ու արժանավայել կյանք։
